काठमाडौं– निर्वाचन आयोगले जनता समाजवादी पार्टी नेपालबाट टुक्रिएको जनता समाजवादी पार्टीलाई नयाँ दलको मान्यता दिएको छ।

वरिष्ठ नेता तथा सांसद अशोक राईको नेतृत्वमा ७ सांसद र ३० जना केन्द्रीय सदस्य हस्ताक्षरसहित आयोगमा परेको दल दर्ताको निवेदनमाथि आयोगले अध्ययन गरि नयाँ दलको रुपमा मान्यता दिने निर्णय गरेको हो।

उपेन्द्र यादव नेतृत्वको जसपा नेपालबाट टुक्रिएको समुहले नयाँ दलको नाम जसपा राखेको छ। दल दर्ता सम्बन्धी अध्यादेश खारेज भएको अवस्थामा जसपालाई नयाँ दलको मान्यता दिनु अवैधानिक भएको जसपा नेपालले बताएको छ। तर आयोगले भने अध्यादेशबाट बनेको राजनीतिक दल दर्ता सम्बन्धी नियमावलीमा टेकेर दल दर्ता गरेको जनाएको छ।

जसपा दल दर्ताको जानकारी जसपा नेपाललाई दिने र संघीय संसद एवं प्रदेश सभा तथा जिल्ला निर्वाचन कार्यालयलाई पनि जानकारी गराउने आयोगले निर्णय गरेको छ।