काठमाडौं- आज २८ अप्रिल। विश्व इतिहासका असंख्य घटनाले देश, क्षेत्र र स्थान विशेषमा आजको दिन स्मरण गराउँछन्। प्रस्तुत छ, तीमध्ये विश्व चर्चित केही प्रमुख घटनाको सारसंक्षेप।
– सन् २००४- बगदाद जेलमा सीआईएको यातनाको तस्बिर सार्वजनिक
इराकको बगदादस्थित जेलमा अमेरिकी गुप्तचर एजेन्सी सीआईएका कर्मचारीले बन्दीहरूलाई दिएको चरम यातना र हत्याको तस्बिर आजकै दिन सार्वजनिक भएको थियो। अमेरिकी टेलिभिजन सीबीएसमा प्रसारित ६० मिनटको रिपोर्टमा अमेरिकी सैनिक र सीआईए कर्मचारीले कसरी चरम यातना दिँदै बन्दीहरूको हत्या गर्थे भन्ने देखाइएको थियो। त्यसबाट इराकमा अमेरिकाले चरम मानव अधिकार उल्लंघन गरेको सार्वजनिक भएको थियो।
– सन् २००१- डेनिस टिटो बने पहिलो अन्तरिक्ष पर्यटक
सन् २००१ मा आजकै दिन अमेरिकी अर्बपति व्यापारी डेनिस टिटोले पहिलो अन्तरिक्ष पर्यटकको रेकर्ड राखेका थिए। रुसी रकेटमा बसेर क्यालिफोर्नियाका उनी अन्तर्राष्ट्रिय स्पेस स्टेसन पुगेका थिए।
– सन् १९४५- मुसोलिनीलाई मृत्युदण्ड
इटालीका क्रुर तानाशाह बेनिटो मुसोलिनीलाई सन् १९४५ मा आजकै दिन मृत्युदण्ड दिइएको थियो। सत्ताच्युत भएपछि उनी देश छाडेर भाग्ने प्रयासमा थिए। तर, पक्राउ गरेर उनलाई मृत्युदण्ड दिइएको थियो।