कैलाली । सुदूरपश्चिम प्रदेशको मुख्यमन्त्रीमा नियुक्त भएका दीर्घ सोडारीले एक साता भन्दा बढी समय बित्दासमेत मन्त्रीमण्डल विस्तार गर्न सकेका छैनन् ।
नेकपा एकीकृत समाजवादीबाट मुख्यमन्त्री बनेका सोडारीले हालसम्म नागरिक उन्मुक्ति पार्टीका कैलाश चौधरी बाहेक अन्य कसैलाई पनि मन्त्री नियुक्ति गर्न सकेका छैनन । उनले आफू मुख्यमन्त्रीमा नियुक्ति भएकैदिन बैशाख ६ गते चौधरीलाई भौतिक पूर्वाधार विकास मन्त्रीमा नियुक्ति गरेका थिए ।
सात मन्त्रालय रहेको सुदूरपश्चिम प्रदेशमा भागबन्डा मिलाउन मुख्यमन्त्री सोडारी मन्त्रालय टुक्र्याउने सम्मको तयारीमा रहेको बताइन्छ ।
सत्ता साझेदार दल नेकपा माओवादी केन्द्र, नेकपा एमाले र नागरिक उन्मुक्तिलाई भागबन्डा मिलाउन मुख्यमन्त्री सोडारीलाई हम्मेहम्मे परेको बताइन्छ । सबै दलबाट मन्त्रीका आकाक्षी बढी भएका कारण तत्काल सरकार विस्तार गर्न समस्या भएको हो ।
एमालेले मुख्यमन्त्रीमा सोडारीको नियुक्तिमा समेत असन्तुष्टि जनाएको थियो । नियुक्तिपछि एमालेले मुख्यमन्त्री सोडारीलाई समर्थन गरे पनि तत्काल सरकारमा नजाने निर्णय गरेको छ । एमालेको यो निर्णयसँगै प्रदेश सरकारका विषयमा थप अन्योल देखिएको छ ।