जनकपुर– जनकपुरको रामानन्द चोकस्थित होटल होलिडे एण्ड गेस्ट हाउसमा महिला र युवक झुण्डिएको अवस्थामा मृत भेटिएका छन्।
उनीहरू होटलको कोठामा एउटै पासोमा झुन्डिएको भेटिएका प्रहरीले जनाएको छ। प्रहरीका अनुसार महिला विवाहित हुन् भने युवक अविवाहित हुन्। महिला र युवक झुन्डिएको कोठामा महिलाकी नाबालिका छोरी सकुशल भेटिएकी छन्।
मृत भेटिनेमा लोहारपट्टी नगरपालिका-४ महोत्तरीकी २५ वर्षीया प्रियंका कापर र पिपरा गाउँपालिका-३ महोत्तरीका ३१ वर्षीय हितेन्द्र पासवान छन्।
पीपरा माइती भएकी प्रियंका र ती महिलाबीच विवाहेत्तर सम्बन्ध हुनसक्ने प्रहरीले अनुमान गरेको छ। उक्त होटलमा ती महिला नाबालिका छोरीलाई लिएर तीन-चार दिनदेखि बसिरहेको खुलेको छ।
उनीहरूले कोठामा भित्रबाट चुकुल लगाएर झुण्डिएको अवस्थामा फेला परेको धनुषा प्रहरी प्रवक्ता डीएसपी रञ्जन अवाले बताए। मृतक युवकका आफन्त उनलाई खोज्दै होटलमा पुगेका थिए। भित्रबाट बच्चा रोएको आवाज आएको भन्दै आफन्तले प्रहरीलाई खबर गरेपछि प्रहरीले ढोका फुटाएको थियो।