भैरहवा (रुपन्देही)- तराई क्षेत्रमा लामो समयदेखि वर्षा नहुँदा यहाँको जनजीवन प्रभावित भएको छ।
पानी अभाव र सुक्खा मौसमका कारण रुपन्देहीका विभिन्न स्थानमा आगलागी हुँदा चौपाया, अन्नबाली एवं घरमा क्षति भएको छ।
रोहिणी गाउँपालिका–६ बाट शनिबार अपराह्न नौवटा गाउँमा आगो फैलिएको जिल्ला प्रहरीका डीएसपी मनोहर भट्टले जानकारी दिए। गहुँको नलबाट शुरु भएको आगो बतासका कारण फैलिँदा विष्णुपुरा, पर्सा, बुची, बरवा, तर्कुलहा, कोटहवा, चम्कीपुर हुँदै प्रिप्रहवामा क्षति भएको छ।
आगोले मानवीय क्षति नभए पनि ४० वटा घर जलेका तथा ३९ वटा बाख्रा मरेको प्रहरीले जनाएको छ। प्रहरी, सशस्त्र प्रहरी, सेना, देवदह नगरपालिकाको दमकल र स्थानीय बासिन्दाको प्रयासले साँझ आगो निभाइएको थियोे।
आगलागीका घटना जिल्लाभरि नै भएको डीएसपी भट्टले बताए। गैडहवा गाउँपालिकामा पनि आगलागीमा लाखौंको क्षति भएको छ। वडा नं ७ सिसैंका बाले मिन्द्र लोधको फुसले छाएको गोठमा विद्युत् चुहिँदा आगलागी भएको थियो। उक्त गोठमा रहेका नौ बाख्रासहित तीन लाख रुपैयाँभन्दा बढीको क्षति भएको प्रहरीले जनाएको छ।
लुम्बिनी सांस्कृतिक नगरपालिका–९ पिपरामा खेतमा गहुँका ठुटा जलाउने क्रममा लागेको आगोे होटल पवन प्यालेस परिसरमा पुगेको थियो। यसबाट प्लाइउड, लत्ताकपडा, भाडावर्तन, खाद्यान्नलगायत सात लाख रुपैयाँबराबरको क्षति भएको छ।