सुनसरी– सुनसरीको इटहरी उपमहानगरपालिका-४ स्थित मुक्तिघाटमा शव जलाउन चिता बनाउने शव जलाउने काम गर्दै आएका कामदारको हत्या गरको आरोपमा प्रहरीले मलामीलाई पक्राउ गरेको छ।

घाटमा काम गर्दै आएका स्थानीय २७ वर्षीय विनोद तामाङको चिर्पट प्रहार गरी हत्या गरेको अभियोगमा गैरीगाउँका ३७ वर्षीय उमेश तामाङलाई प्रहरीले पक्राउ गरेको हो। उनलाई सोमबार नै पक्राउ गरेको प्रहरीले बताएको छ।

इटहरी उपमहानगरपालिका-४ गैरीगाउँबाट मलामी आएका उमेश तामाङ र धरानका ३० वर्षीय अनिल तामाङले विनोदमाथि चिर्पट प्रहार गरेका थिए। कुटपिटबाट गम्भीर घाइते भएका विनोदको उपचारको क्रममा मृत्यु भएको हो।

घटनापछि अनिल तामाङ फरार रहेको र उनको खोजीका साथै घटनाबारे थप अनुसन्धान गरिरहेको प्रहरीले बताएको छ।