झापा चिया जग्गाको फैसला आएपछि
सबै तैं चुप मै चुप छन्

चियाको जग्गा बेच्‍नेहरू
ङिच्च दाँत देखाउँदै
भ्रष्‍टाचार भो
बदमासलाई कारवाही हुनुपर्छ
भन्दै कराउँदै छन्

यस्तो फैसला आएको भए लाजले
जापानी नेता भए हाराकिरी* गर्ने थिए

सिंगापुरका नेता भए
छतबाट हाम फाल्ने थिए

चीनका नेता भए
पाता कसेर झुण्डिन तैयार हुने थिए

गज्जब छ नेपाल जहाँ लाज शरमले
हाराकिरी गरिसकेको छ
जहाँ लाज शरमले
छतबाट हाम फालिसकेको छ
त्यहाँ
खुलेआम डकैती गर्दा के को अचम्म

सुटकेस भरी-भरी बुझी
खाटमुनि ढुसी लागी लुकेको
रकमको मालिकाना हक लाग्‍नेको
छटपटी बिछट्टै छ
बुझाएको नजराना
फिर्ता हुने हो कि होइन भनेर

जनता चनाखो हुनुपर्छ
बुद्धिजीवी सचेत हुनुपर्छ

एडभान्स बुझेको रकम पचाउन
अर्को खेत बेचिने त होइन ?
फेरि कुनै नयाँ प्रपञ्‍च त रचिने होइन ?

उधारो घुस खानेको मुखमा
कीरा परोस्

जय होस् सही न्याय दिने
न्यायमूर्ति र अधिवक्ताको

(*हाराकिरी भनेको समाजमा मुख देखाउन नसक्ने भएपछि आफ्नो पेटमा आफैंले छुरा रोपी आत्महत्या गर्ने जापानी चलन)