काठमाडौं- आज १३ अप्रिल। विश्व इतिहासका असंख्य घटनाले आजको दिन स्मरण गराउँछन्। प्रस्तुत छ, तीमध्ये केही प्रमुख घटनाको सारसंक्षेप।
– सन् १९९७- टाइगर उड्स बने गल्फका युवा विश्व च्याम्पियन
सन् १९९७ मा अमेरिकी गल्फर टाइगर उड्स गल्फको मास्टर टुर्नामेन्ट जित्ने पहिलो युवा बनेका थिए। त्यतिबेला उनी २१ वर्षका मात्र थिए। उनी गल्फको अन्तर्राष्ट्रिय प्रतिस्पर्धा जित्ने पहिलो अफ्रिकी मुलका व्यक्ति पनि हुन्। टाइगर उड्सलाई हालसम्मका सर्वाधिक सफल गल्फ खेलाडी मानिन्छ।
– सन् १९७०- अन्तरिक्ष यानमा पड्कियो अक्सिजन ट्यांक
सन् १९७० मा आजकै दिन एपोलो-१३ अन्तरिक्ष यानमा अक्सिजन ट्यांक पड्किएको थियो। त्यसका कारण यान नै निश्क्रिय बनेको थियो। त्यस आपतकालीन अवस्थामा ज्याक स्विगर्टको भनाइ प्रसिद्ध बनेको थियो- ‘ह्युस्टन हामीमाथि एउटा गम्भीर समस्या आएको छ।’ त्यसका बावजुद चालक दलका सदस्यहरू सुरक्षित रूपमा पृथ्वीमा फर्किन सफल भएका थिए।
– सन् १९६०- विश्वको पहिलो स्याटेलाइट नेभिगेसन प्रणाली कार्यान्वयनमा
सन् १९६० मा आजकै दिन विश्वको पहिलो स्याटेलाइट नेभिगेसन प्रणाली सञ्चालनमा आएको थियो। ‘ट्रान्जिट १ बी’ नाम दिइएको उक्त प्रणाली शुरुवातमा अमेरिकी जल सेनाले आफ्नो नेभिगेसन प्रणाली अपग्रेड गर्ने क्रममा उपयोग गरेको थियो। अमेरिकी नौसेनाले खासगरी आफ्नो पोलारिस सब-मरिनमा उक्त प्रणाली प्रयोग गरेको थियो।
– सन् १९१९- ब्रिटिस सेनाले हत्या गर्यो ४०० निहत्था भारतीयको
सन् १९१९ मा आजकै दिन बेलायती सेनाले भारतमा करिब ४०० निहत्था सर्वसाधारणको हत्या गरेको थियो। बेलायती ब्रिगेडियर जनरल रिगेनाल्ड डायरले निहत्था सर्वसाधारणमाथि गोली बर्साउन आदेश दिएका थिए। उनले भनेका थिए, ‘हाम्रो अवज्ञा गर्ने भारतीयहरूलाई दण्डित गर।’ अमृतसरको त्यस जालियावाला वाग नरसंहारपछि भारतीय स्वतन्त्रता संग्रामले अझ मजबुती पाएको थियो।