काठमाडौँ । नेपाली कांग्रेसको भातृ संगठन नेपाल विद्यार्थी संघका अगुवा नेता तथा कार्यकर्ताले आगामी स्थानीय तहको चुनावमा महत्वपूर्ण भूमिका दिन माग गरेका छन् । आज शुक्रबार रिपोर्टर्स क्लब नेपालमा पत्रकार सम्मेलन गर्दै उनीहरूले कांग्रेसलाई जिताउन नेविसंघले महत्वपूर्ण भूमिका खेल्ने दाबी गरे ।
सम्मेलनमा बोल्दै नेविसंघका पूर्व महामन्त्री युवराज पाण्डेले नेविसंघको नेतृत्वबारे छलफल हुन पर्ने बताए । उमेरको मात्र आधारलाई नहेरेर सबै समस्यालाई उठान गर्न सक्ने नेतृत्वको आवश्यकता रहेको औंल्याउँदै उनले १२ औं महाधिवेशनबाट ३२ वर्षे उमेर हद लागु हुने विधान बनाएको बताए । पार्टीको उमेरहद लगाउने निर्णयलाई आश्चर्य मान्न नहुने उनको भनाई थियो ।
त्यस्तै, संघका पूर्व सहमहामन्त्री तथा प्रवक्ता प्रेमराज जोशीले नेविसंघको आवश्यकता सबैलाई बुझाउनु पर्ने बताए । नेविसंघको १२ औं महाधिवेशन नभएकाले अहिले लथालिंग अवस्थामा पुगेको उनको भनाई थियो ।
उनले भने, ‘भोटरलाई मतदान स्थलसम्म पुर्याउने र कांग्रेसको पक्षमा भोट हाल्ने बनाउने त्यो जिम्मेवारी नेविसंघको काँधमा रहेको छ ।’
पूर्व केन्द्रीय सदस्य प्रेमिका राना मगरले नेपाली कांगे्रसलाई आगामी स्थानीय तहको निर्वाचन जित्न नेविसंघको भूमिका महत्वपुर्ण रहेको बताइन् । यस्तै, उनले नेविसंघको केन्द्रीय (सभापति) अध्यक्ष पदको आफू दाबेदार भएको बताइन् ।
यस्तै, जनप्रशासन क्याम्पसका नेविसंघका सभापति टंक सुवेदीले नेविसंघ खोइ ? भन्दै प्रश्न गरे । नेविसंघको नेतृत्व नहुँदा सबै लथालिंग भएको उनको भनाई थियो ।
नेविसंघका पूर्व केन्द्रीय सदस्य तारक केसीले केन्द्रीय नेतृत्व भताभुंग भए पनि नेविसंघका क्याम्पस र जिल्ला स्तरका कमिटी क्रियाशिल रहेको बताए ।
कार्यक्रममा संघका पूर्व केन्द्रीय सदस्य शैलेन्द्र शर्माले नेविसंघले आगामी स्थानीय चुनावमा कांग्रेसलाई जिताउन पर्ने धारणा राखे । अहिलेको अवस्थामा पुराना र अनुभवी नेताको आशिर्वाद र सल्लाहबाट अगाडि बढ्नुपर्ने ट्टकारो आवश्यकता रहेको जिकिर गरे ।
संघका पूर्व कोषाध्यक्ष शिव रिमालले नेविसंघ कहाँ छ ? भन्दै टर्च लाइट बालेर खोज्न पर्ने दिन आएको सुनाए ।