काठमाडौं– आरिफ शेखको उत्कृष्ट ब्याटिङमा नेपाल ‘ए’ ले तेस्रो तथा अन्तिम टी-२० खेलमा आयरल्यान्ड ‘ए’ लाई जितका लागि दुई सय १४ रनको विशाल लक्ष्य दिएको छ।
कीर्तिपुरस्थित त्रिभुवन विश्वविद्यालयको क्रिकेट मैदानमा जारी खेलमा टस हारेर पहिला ब्याटिङको निम्तो पाएको नेपालले निर्धारित २० ओभरमा सात विकेट गुमाउँदै दुई सय १३ रनको योगफल बनायो।
नेपालका लागि आरिफ शेखले सर्वाधिक ९३ रनको योगदान दिए। उनले ४८ बल खेल्दै सात चौका र छ छक्काको सहयोगमा अविजित ९३ रनको योगदान गरेका हुन्। त्यसैगरी रासिद खानले २४ रन बनाउँदा पवन शर्राफले १३ रन जोडे। बसिर अहमदले १९ रन बनाए भने कप्तान विनोद भण्डारी ११ रनमा आउट भए। त्यस्तै लोकेश बमले आठ रन जोड्दा देव खनालले ६ रनमा आउट भए।
बलिङतर्फ आयरल्यान्ड ‘ए’ का फिन ह्यान्डले दुई विकेट लिए भने लियाम म्याकार्थी ग्यारेथ डेलानी म्याथु फोस्टर र गेभिन होइले समान एक/एक विकेट लिए।
अहिले आयरल्यान्ड ए जवाफी ब्याटिङमा उत्रेको छ। ताजा अवस्थामा आयरल्यान्ड ‘ए’ले ३ ओभर समाप्तिमा बिना विकेट क्षति ३९ रन बनाएर खेलिरहेको छ।